React — foydalanuvchi interfeysini qismlardan yig'adigan kutubxona. DOM darslarida sahifani qo'lda o'zgartirgandingiz: element topib, matnini almashtirib, ro'yxatga yangi qator qo'shib. Ilova o'sgani sayin bu yo'l chalkashadi — qaysi joyni yangilashni unutsangiz, ekrandagi ma'lumot haqiqatdan ajralib qoladi.

React boshqacha yondashadi: siz qanday o'zgartirishni emas, natija qanday ko'rinishi kerakligini yozasiz. Ma'lumot o'zgarsa, React ekranning qaysi qismini yangilashni o'zi hisoblaydi.

Bo'lim JSX va komponentdan boshlanadi, keyin props bilan ma'lumot uzatish, ro'yxat chizish va hodisalarga javob berish keladi. So'ng holat (useState) — React'ning yuragi: nega oddiy o'zgaruvchi yaramaydi va qayta chizish qanday ishlaydi.

Oxirida useEffect bilan yon ta'sirlar, fetch orqali serverdan ma'lumot olish va holatni komponentlar orasida bo'lishish. Yakuniy darsda hammasi bitta ishlaydigan ilovada birlashadi.

Kimga mo'ljallangan. JavaScript asoslarini bilganlarga: funksiya, massiv metodlari (map, filter), destructuring va modullar. Ular bo'lmasa React sehrli ko'rinadi — kod ishlaydi, lekin nega ishlayotgani noaniq qoladi.

Bu bo'limda nima o'rganasiz

JSX — JavaScript ichida interfeys yozish va uning HTML'dan farqi
Komponent yaratish va ularni bir-biriga joylash
props bilan ma'lumotni yuqoridan pastga uzatish
map bilan ro'yxat chizish va key nega kerakligi
Hodisalar — onClick, onChange va funksiya uzatish
useState — holat va qayta chizish mexanizmi
Forma va boshqariladigan elementlar
Shartli ko'rinish — nimani qachon ko'rsatish
useEffect va serverdan ma'lumot yuklash
Holatni ko'tarish — komponentlar ma'lumotni qanday bo'lishadi